طريقة عمل الغريبة الدايبة زى المحلات

اعملى احلى غريبة فى البيت بنفسك

السلام عليكم ورحمته وبركاته

انا هاعمل لكم ملف بحلويات العيد كلها ان شاء الله

فهنبتدى النهاردة بالغريبة وبعدها البيتى فور لانهم اكتر حاجة مبتظبطش مع ناس كتير

وبيتكلفوا صراحة حرام نكلف والحاجة تبوظ مننا هاقولك المقادير بالمظبوط بس الاهم من المقادير التكات اللى هاقولها لو التزمتى بيها هتديكى شغل عالى جدا زى المحلات ان شاءالله

مقاديرالغريبة 

4 كوب دقيق ممكن تحتاجى اقل فيضاف تدريجي 

2 كوب سمن بلدى او زبدة سايحه على الهادى لحد ماتنشف المية اللى فيها

وبرضه حطيها تمسك نفسها شوية فى التلاجة 

كوب سكر بودرة

ذرة ملح 

فانليا 

مكسرات 

او كريز 

او خرز ملون للحلويات

او قرنفل
المقادير بالكيلو 
800جرام دقيق او يزيد
نص كيلو سمنة 
200جرام سكر بودرة 

شرح تحضير الغريبة بالتفصيل

نفس طريقة البيتى فور والبسكوت 

اضربى السمنة كويس جدااااااا لحد ما تبقى زى الكريمة

وبعدين ضيفى السكر والفانيليا بالتدريج واحدة واحدة 

 وكملى ضرب لحد مالون الزبدة يبقى ابيض خالص

بعدها انزلى بالدقيق والملح تدريجيا 

   لحد ماالعجينة تلم معاكى 

ولماتيجى تكوريها متشققش منك

لو عاوزاها بالشيكولاتة شيلى جزء من الدقيق وحطى مكانه كاكاو 

كوريها كور صغيرة لانها هتزيد لماتستوى
بعدين ريحيها فى التلاجة شوية لان الجوحر ولماتطلع ادعكيها تانى لحدمالونها بيبض الخطوة دى مهمة جدا بتخليها دايبة دوب 

ياتعمليها سادة

يا تحطى اى مكسرات تحبيها انا حطيت سودانى

و زبيب

ورصيها فى صاج مش مدهون اى مادة دهنية

سيبى مسافة بسيطة بين الواحدة والتانية 

ودخليها فرن هادى تقريبا 140 او 160 درجة على الرف الوسطانى

ويدوبك تمسك نفسها تطلعيها قبل ما تدخل ع اللون الدهبى يدوبك اصفر خفيف من تحت 

ومش هتاخد وقت كبيرها 10 دقايق بس

الشكل النهائى للغريبة 

اتفضلى بالف هنا دى سادة 

ودى بالسودانى 

ودا زبيب دايبة خالص مالص 

تكات مطبخ ام عمرو خالد لنجاح الغريبة

1-خلينا نتفق كدا اولا ان الغريبةلا فيها بيكنج بودر ولا بيض بس فى وصفات بتضيف بياض البيض علشان تضمن ان الغريبة متشققش  

2-الغريبة دقيق وسمنة وسكر بودرة بس

ومقادير الغريبة السمنة نص الدقيق والسكر نص السمنة بالنسبة لمقادير بالكيلو ياجماعة  200 جرام سكر او اكتر ربع كيلوحسب رغبتك وذوقك عليه نص سمنة وكيلو الاربع دقيق وممكن يزيد يعنى حسب ماالعجينة تلم معاكى 

3-وياريت تكون بالسمنة البلدى ومع ذلك تنفع بالزبدة علشان الاخت اللى بترفع ايديها ورا دى و هتسال زى كل مرة معنديش سمنة تنفع بزبدة ايوا ياستى تنفع بس سيحيها الاول وتخلصى من المية اللى فيها واللبن وحطيها تجمد فى التلاجة زى السمنة 

4--لازم يكون السكر ناعم جدا مفيهوش اى حبيبات او كلاكيع علشان كدا بننخله الاول قبل مانشتغل 

5-السمنه او الزبدة تكون فى التلاجه متكونش سايحة ونضربها كويس مع السكر لما يدوب خالص لانه لو ما دابش كويس ها يخلىها تفرش وكمان يلزق فى الصاج

6-متحطيش كل الدقيق مرة واحدة حطى شوية شوية لحدماتلم ممكن متحتاجيش كل الكمية 

7- نوع الدقيق مهم جدا ياجماعة لازم دقيق حلويات اناباستعمل فارينو دورحلو جدا

8-فى نوع دقيق بيطرد السمنة دا مينفعش خالص للحلويات علشان كدا لازم تطلبى دقيق حلويات 

9- ما نعجنش خالص يدوب نجمع العجينه عشان لو اتعجنت ممكن السمنه تفصل بعد كده عن العجينه ونزود دقيق حسب ما تحتاج العجينه فى ايدينا

10-بعد التشكيل نخلى بالنا نسيب فراغات بين الغريبة عشان هيزيد حاجة بسيطة مش اووى

11- لما تطلعيها من الفرن متلمسيهاش قبل ما تهدي شويه لانها بتبقي ناعمة و ممكن تتكسر بسهولة

12-غريبة المحلات ناعمة ليه اقولك بقى اول شىء غريبة المحلات مبتكونش مستوية زى بتاعتنا يعنى نص نية تقريباعشان كده بتكون بيضا وناعمة اوى وحتى مش بتحمر من تحت 

فانتى يادوبك بتدخليها فى فرن البوتاجاز على حرارة اقل من 160 وبمجرد ماحجمها يكبر يعنى الكور تفرش تطلعيها من الفرن وبسرعة 

تشيليها بحذر وتحطيها فى علبة مقفولة 

13-لو فرشت منك يا أبلة يعنى مقدار السكر مش مظبوط وزااااااايد 

14-انا مكتبتش المقادير بالكيلو ياريت تعايروها بالكوباية احسن وافضل لان 

كيلو الدقيق بيعمل عدد اكواب مختلف عن عدد اكواب السمن او السكر . .عشان كده كيليه بالكوب افضل واستخدمي نفس الكوب في المكيال هتطلع معاكي مظبوطه .. 

15- فى ناس بتريح العجينة فى التلاجة ساعتين الاول انا هاقولك تريحيها ولا لا وازاى تعرفى انها محتاجة ترتاح انا على طول باشتغل بيها مباريحهاش لانى باعملها بزبدة طرية وماسكة نفسها زى مانتى شايفة انما لو الجو حر وممكن السمنة وانتى بتشتغلى بيها تسيح شوية وتلاقى العجينة ملزقة او طرية اوووى سيبيها ترتاح فى التلاجة شوية لحدماتاخدى منها حتة تكوريها تلاقيها حلوة مش مشققة ودا ليه بقى علشان السمنة لو سايحة وانتى بتسويها هتنزل فى الصاج وكمان الدقيق هيطردها وهتبقى الغريبة او البيتى ناشفين اما لو هى طرية كدا ودخلتيها تستوى على بال ما تشقر بس من تحت وتمسك نفسها متصفرش حتى هتكون تعتبر استوت والزبدة لسه ما ساحتش فاتحبست جواها علشان كدا بتكون طرية وناعمة 

طبعا انا ابعملها اصغر من كدا بس كان فى ايادى خفية بتساعدنى هههههههههه

16-الغريبة محتاجة نارهادية ياجماعة لو النارعالية هتشقق وكمان هتستوى بسرعة من بره ومن جوه تبقى نية اول ماتلاقيها مسكت نفسها ولونهامن تحت بقى اشقر وينفع تحركيها بسهوله يبقى كدا تمام هتلاقى 

17-لو لا قدرالله وحصل وطلعت ناشفة منك سيبيها على الصاج فى المطبخ لتانى يوم متشيليهاش على طول بعدالسوا وان شاء الله هتلاقيها بقت طرية وزى الفل