الرز المعمر بالفراخ باسهل طريقة
وصفة النهاردة طاجن الرز المعمر ودا طبعا له اكتر من طريقة يا اما حادق يااما حلو والحادق بيكون يا سادة يا بالفراخ او اللحمة او الحمام او الكلاوى او بانيه او كبد وقوانص يعنى الخيارت متنوعة قدامك اختارى اللى يعجبك واللى فى امكانياتك انا النهاردة عملته بفراخ للولاد من باب التغيير والطعم اكثر من رووووعة
2كوب رز مصرى
كيلو لبن يفضل جاموسى
سمن بلدى او زبدة صفراء
قشطة او وش لبن او زبادى او كريمة
فرخة متوسطة الحجم
فرخة متوسطة الحجم
بصلة مفرومة
فص توم مفروم (اختيارى)
ملح
فلفل اسود
رشة جوزة الطيب (اختيارى )
اول حاجة ياريت نستخدم طاجن فخار بلدى او مطلى اللى يريحك
ولو مفيش يبقى صينية الومنيوم تيفال بيركس اى حاجة شغالة
غسلت الرز كويس ونقعته شوية فى المية
وهننقى الرز وبعدين هنغسله كويس وياريت ننقعه شوية فى المية
ويفضل اننا نغسله فى البرام او الصينية اللى هنسويه فيها علشان ميطلعش زيادة بعدالغسيل يكون تقريبا نص البرام لانه لسه هيزيد وهنحط لبن
وبعدين حطيت اللبن يغلى على النار خطوة غلى اللبن دى بتوفر الوقت فى السوا شوية
وكل كوباية رز بتاخد كوباية لبن وفى الاخر هنزود نص كوباية يعنى لو هنعمل 3كوبايات رز يبقى هنحتاج 3ونص كوباية لبن تقريبا كيلو الا حاجة بسيطة
واكيد الرز المعمر يعنى قشطة سمنة بلدى او زبدة صفراء مينفعش بدون اى حاجة من دول وبالذات القشطة هى اللى بتخليه يعمل الوش الدهبى اللى كلنا عارفينه انا هنا عندى وش اللبن كنت محوشاه اعمله سمنة
طبعا الوصفة دى تنفع جدا لوعندك فراخ او لحمة بايتة ومستوية ممكن تستعمليها عادى
انا استخدمت فراخ نية وسويتها نص سوا وياسلام لو اتبلت قبلها كانك هتشويها بتكون احلى واحلى
المهم هنخلط الملح والفلفل وجوزة الطيب والبصل
وبعدين هنشوح الرز فى الحلة بسمنة بلدى او زبدة ودى خطوة مهمة برضه بتخليه مفلفل وزى الفل لمايستوى ويقصر مدة السوا كمان والاهم بتلاقى طعم السمنة فى الرز اقوى لاننا بندخل السمن جوه كل حبة رز لو مش حابة التشويح اوك مفيش مشكلة خالص
وبعدين ادى له رشة ملح وفلفل اسود
نيجى للفراخ حطيتها فى الحلة وخليت الجلد من تحت علشان الدهون تنزل منها ومنحتاجش سمن تانى
وبعدين ضفت البصل والتوم والبهارات لوتحبى تزودى تانى بهارات اوك
وشوحتها لحد ما شربت ميتها وبعدين ضفت لها فنجان شوربة تستوى شوية لانها بالعضم علشان الرز هيستوى قبلها وغطيت عليها
اول ما استوت نص سوا طفيت عليها
وجهزت الطاجن بقى طبعاممكن صينية عادى المهم
حطيت نص الرز فى الطاجن
وساويته وبعدين حطيت الفراخ عليه ولو فى اى صوص فى الفراخ ضيفيه برضه
وبعدين باقى الرز هو مكانش كتير لانى كنت عاملة اكل تانى معاه بس المفروض الطاجن يكون عميق والفراخ متبانش منه زى كدا
بعدين اللبن المغلى ولومحتاج اى ملح اوتوابل بس هو كدا تمام اوى
ووزعى القشطة على وشه او الكريمة وممكن تخليها للاخر لمايتشرب اللبن عادى وممكن برضه نستغنى عنها
ودخلته فرن مسخناه قبل كدا وحطيته على اول رف وبعدمااستوى خلاص لو وشه لسه مااتحمرش يبقى نولع الشواية
وكنت عاملة جنبه حمام
وملوخية خضراء
والطريقة بالتفصيل لو ضغطتى على الصور هتلاقيها
تعليقات
إرسال تعليق