الخميرة المنزلية باكثرمن طريقة
طبعا كلنا بنحب المعجنات والعيش دايما مبنستغناش عنه بالبيت وطالما فيه عيش لازم خميرة واوقات متبقاش متوفرة او فى ناس متحبش تستخدمها لانها كيميائية وبتدور على بدائل طبيعية
فى الموضوع دا اكترمن طريقة لتصنيع الخميرة منزليا يارب يعجبكم
مقاديرخميرة اللبن
2كوباية دقيق
حوالى كوباية لبن
او مية دافية
2معلقة سكر او عسل
5حبات فول او فصوص توم
مقادير2
شرش اللبن او لبن حامض
دقيق
خميرة الحمص
نص كوباية حمص مطحون
2كوباية لبن دافى
معلقة سكر
كوباية دقيق
الخميرة باستخدام البطاطس
دقيق
مية سلق البطاطس
معلقة سكر
الطريقة الاولى الخميرة السائلة
مبدئيا كداالطريقة دى طويلة شوية وبتاخدوقت بس هى مرة واحدة هتعمليها
هناخد الاول معلقة دقيق ومعلقتين مية ومعلقة سكر
ونخلطهم كويس هتكون عجينة سايلة زى عجينة القطايف كدا او لقمة القاضى
ونحفظهم فى برطمان يكون ازاز معقم طبعا وسيبيهافى مكان دافى لمدة ليلة كاملة
بعدين نضيف تانى معلقة دقيق ومعلقتين مية ونخلطهم مع الخليط الاولانى وهكذا لمدة 5 ايام
لحدماتلاقى الخميرة اتكونت واتفاعلت وطلعت فقاقيع كدا بقت جاهزة للاستخدام اضافة الدقيق دا غذاء للبكتريا النافعة والسكربينشطها
هناخدمنها معلقة مع كوباية دقيق ونعجنهم بالمية وتقريبا نص كوباية مية او اكترحسب نوع الدقيق وغطيها ليلة كاملة تتخمر دى هتكون الاساس بتاعنا باى نوع عيش عاوزينه
نجيب بقى كمية الدقيق بتاعتنا ونعجن بالمية ونضيف عليها الخميرة البلدى دى ونكمل عجن عادى وكل كيلو دقيق ليه معلقة خميرة الميزة بالخميرة البلدى دى انها طبيعية مش كيميائية خالص وبتساهم فى تكاثر البكتيريا الحيوية المفيدة الموجودة في أمعائنا.
لو حصل وجيتى مرة طلعتيها بالتلاجة لقيتها مش نشطة تخلصى من السائل اللى فيها وضيفى مية دافية ودقيق تانى علشان ننشطها
طريقة عمل الخميرة باللبن
تانى طريقة والاسهل والاسرع كمان هنضيف الدقيق مع اللبن او شرش اللبن او زى مابيقولوا اللبن الحامض اوحتى المية
ودى بتكون العجينة متماسكة مش سايلة زى الاولى ويتكون اسرع كمان هنعجن الدقيق باللبن او المية الدافية
وبعدين نغرس فيه 5حبات فول اوفصوص توم وبعدين تتغطى بنايلون استرتش او كيس بلاستيك
وتسيبيها تخمر وتتضاعف يوم او يومين حسب درجة حرارة الجويفضل مكان دافى والجو حاليا برد ممكن تلفى البرطمان بفوطة طلعى التوم او الفول وارميه وبعدين استخدميها بالعجن ولو اتبقى جزء احفظيه بالتلاجة
فى طرق تانية لتحضير الخميرة بتكون بالشعير والتمر كبديل طبيعى عن السكر
طريقة عمل خميرة الحمص للفايش الصعيدى
اولا يابنات الحمص اللى نقصده بتاع السبوع او حمص الطبيخ
هندفى اللبن وبعدين نضيف السكر وبعدين لمايغلى نضيف الحمص المطحون ونقلب كويس اووى
ونحطها فى برطمان ازاز معقم ومقفول كويس ونجيب فوطة ونغطيه كويس علشان نحتفظ بيها سخنة اطول وقت
اوندفنها جوه طبق ردة او دقيق
ونيجى تانى يوم الصبح نجيب كوباية دقيق ونضيفها عالخليط دا وبعدين نسيبها تخمرتانى ونعجن بيها بعدكدا
وممكن نستبدل الحمص بالعدس المطحون او السمسم المتحمص او فول مدشوش بتاع الطعمية برضه
وكل كيلو دقيق هناخدله 3او 4معالق خميرة كبارلان الخميرة دى بتكون اضعف من الفورية والبيرة وكمان الجو برد العجين بياخد وقت لمايخمر
دى الطريقة الصح يابنات اللى بتخلى الفايش الصعيدى له ريحته المميزة مع باقى مكوناته زى الكركم والمحلب وخلافه
انما الفايش بتاع الافران دا حضراتكم ماهو الا عجينة فينو عادية خالص وكركم للون مالوش اى علاقة بالفايش خالص واللى من الصعيد هياكد كلامى دا
طريقة عمل الخميرة بالبطاطس
هنسلق البطاطس بقشرها وطبعا تكون مغسولة كويس جدا الاول ويشترط تكون جديدة زى اليومين دول متكونش متخزنة وعليها بودرة
ونسيب مية السلق تهدى شوية تكون دافية زى دمعة العين
وبعدين نضيف عليها الدقيق وليكن معلقة ومعلقتين مية ونقفل البرطمان كويس اوى ونسيبه لتانى يوم ونعيد نفس القصة لمدة 5 ايام معلقة دقيق و2مية دافيه وهكذا
واخريوم ناخدمعلقة ونعجنها بكوباية دقيق وشوية مية تانى لماتخمر نضيفها لباقى الدقيق اللى هنشتغل بيه الوصفة
وتتحفظ بالتلاجة زى ماقلت فى اول طريقة لماتاخدى معلقة تضيفى مكانها معلقة تانى علشان تغذى البكتريا وتفضل موجودة عندك على طول مش كل شوية تعملى
بعدماحضرنا الخميرة طبعا
لازم نشتغل بيها ونطبق داقسم المعجنات للى تحب تشوف اى وصفة
دوسى على الصورة هتحولك على طول
واسرار نجاح او فشل المعجنات شوفى الموضوع دا
خلوا بالكم قبل مانستخدم اى خميرة المفروض ياجماعة نختبرها هناخدجزء منها ونعجنه بشوية دقيق لو اتخمرت يبقى تمام نعجن باقى الكمية لو لا طبعا يبقى يااما تغيرى الخميرة ياتزودى الكمية
ارجو الموضوع ينال اعجابكم وشرفتونى
اللهم اجعل اعمالى فى ميزان حسناتى
تعليقات
إرسال تعليق